kaj god vam padne na pamet

    Nedeja j' i danas sigurno čuda judi opet kjane (al kjene), aš su čera pozabili kupit dupli kruh, (al ga morda više nisu našli, aš su se neki drugi spametili kupit duplo), pa moraju sad kramat okole.
 Kjet, kljet al klieti (z dugosilaznen akcenton al čakavsken akuton na e) govori se v Istre, pa preko primorja se tamo do Zadra. Ma mi j' onda čudno da Labinjani reču »Va moje se kuće ni nidar kljilo«,. Pul Turine – Šepića san našel obe besedi kjet i kljet, ma i besedu kljanjat, s kratkosilaznen akcenton na prven a. Književna beseda kleti ima koren va praslavensken zajike, a verujen da znate da j' to – psovati. Neki su pak, kupujuć kruh naš sagdanji, doznali da j' podražel, al pak da ni pocenel kot ča su obećevali, pa su kjenuć seh od reda i Boga zakjeli. Te oni nosit greh na duše, al pak onisti ki su ih na to natirali?!  
   Zaš samo butigi ne smeju delat nedeju? Ča j' semi onemi drugemi? Dobro, ala, popi moru delat nedeju aš nimaju familiji i gredu na mašu, ma zamimo, na primjer, oneh 500 al 600 inšpektori ki te saku nedeju kramat okole. Ne verujen da te zmej jene i druge butigi teć va crekav, al da pak se ki od njih neće ki put po nedejah zakjet i prokjet onisteh ki su zmisleli ta zakon.     Strah me je da su se neki tr neki jako grdo zaje...., oprostite – zahebali, va računeh. Misleli su da te navadit judi hodit više va crekav, da te ih navadit da se više mole! Mesto tega, zaradi sega onega kako delaju i ča nan delaju – navadili su nas (i naprvo nas vade!) se više kjet!!!...:-))) 

ma znaš kaj... a da ti malo propišeš maloplacki? :))

ajme, "oldie..." ovo ni Trnjani ne bi uspjeli pročitati ;) a kud razmeti :)

zajeno si kapija