što sam uradila

Moja mati je bila puno srićna žena.
Nika je muž nije tuka,
ni mu je tribala gaće prati,
ni košulje sumprešavati.
Ni mu je tribala ni kuhati
ni krpati ga,
a mogla ga je svake noći
do mile volje sniti,
u praznoj postelji,
zimi i liti,
dokle buganci pucaju
po rukama i nogama,
a ne moreš oka stisniti,
nimaš s kin rič progovoriti,
ne moreš ni pisniti,
jer ti mali sin
krajin tebe,
poslin igre i teple večere,
spi kako kus driva.
Nega ga, neka spi,
neka malo zahrče kroz nosić,
neka zazvižđe kai fić,
jer to je sve ča joj je od muža ostalo:
ovo diteta, prazna postelja,
jedan stari jaketun,
šuplje postole
i kržetun.
Moja mati je bila puno srićna žena.
Svaku šetemanu,
iz puno ljubavi,
knjigu pisala
u Colon Entre Rios
Republika Argentina,
a bar tri puta na godišće
bi i mene, svoga jedinca,
ćapala i u pero govorila
po četiri pune strane
onih velikih listov
ča su iscrtani kai zadaće za račune.
Govorila bi u pero,
a ja san pisa:
"Dragi i mili moj oče!"
čoviku koga nika nisan vidija
nika mu glasa čuja,
čoviku ki me nika nije udrija,
ni pomilova, koga nika nisan zva "ćaćo!"

Tako bi fureštomu pisa
ča je mati govorila,
a sve ono lipo i teplo
ča bi se našlo u toj knjizi
moga je zafaliti samo
ljubavi moje matere,
nje skrbi i brizi.
Tridese godišć je moja mati,
u praznoj postelji, čekala oca da se vrati.
Nije ni ćutila, jadna kako vrime pasaje
i mladost,
a već je postala baba,
i zanamisto muža, ki nika nije doša,
(tamo su ga zakopali "con Dios" u Colon Entre Rios),
unuci su joj bili svo veselje i sva radost.

Moja mati je bila puno srićna žena
da mi I sada dojdu suze na oči ka se sitin te sriće,
pa bi moga, kai da san mali, zabiti glavu u nje meko krilo
i plakati, plakati

Mladen Bjažić

Jako lijepo.

da, super je:)

krasno:)

ovo moš naći samo u njegovoj zbirci Nevere i bonace, na netu je nema

:)

Tko je autor?
Čini mi se da sam vidio prezime Blažević,Bjažević, tako nekako...

fina, fina :)

divna majka i žena. Dana je to samo u priči
Jedan dio žena ne želi sebe uložiti u stvaranje obitelji i puno puta boraviti u zoni nelagode